Liaba Dank, dass Du am Abschied vu üserem Vater, em Tres teil ninsch.

Er isch nid dr Ma vu viele Wort gsi. Sini 79 Johr in a paar wenige Wort usz’drucka passt e soa grad e chli zu ihm. Damit i bim verzella nid selber konfus chomma, säg i eifach Tres, wenn i dr Vater meina.

Am 8. Mai 1945 hett ma landuf landab Kirchenglocken ghört.

Dr Weltfriede isch iig’lüütet worda und dr Andreas Lippuner hett in Grabs s’ «Licht vu dr Welt» erblickt.

Als dritt’s Chind vu dr Agathe und em Florian Lippuner isch dr Tres mit siina beide Schwöstere, em Annali und em Urscheli, uf em Buurahof i dr Büschebündt ufgwachse.

Noch dr obligatorischa Schuelzyt hett er die landwirtschaftlich’ Berufsschuel b’suecht. Mit Zwänzgi het er d’Jeannette Diller ghürota und die beide sind scho bald drüberab im Mai 1966 zum erste Mol Eltera worda.

Nur 2 Johr noch em Jürg und mir isch dr 3. Bueb Urs is Familialebea treta. Im obere Stock in der Büschäbündt hemmer als 5köpfigi Familie gwohnt.

Wo denn dr Marco und Andrea d’Familia beriicheret henn, isch es denn doch e chli eng worda und so henn d’Zwilling dörfä i di frisch usbaut Firschtchammere ui.

Als Ernährer vum Schneewittli und 5 Zwerga hett dr Tres tagsüber als Chauffeur bi dr Firma Hans Lippuner AG – do z’mol no im Oberdorf – und em Obet uf em elterliche Buurahof gschaffet. Ab und zue hemmer chönnä mit em Lastwage mitfahre – und mit was für mene Stolz. Fast wia er, will uf de Chärre jom hogga isch für ihn Abentüür pur gsi.

Uf Bützä het er als Skiclub-Hüttawart g’amtet. I cha mi no guat erinnere, wo er zämme mit üs Bueba vum Oberdorf mit de Schi bugglet Richtig Gamperney gstampfet isch. Do hets eba no Schnea bis ähi kho. Uf Höächi Lange Stall het jeda e Reiheli Schoggi als Stärchig überhu und mir henn üs gfreut uf s’Skiwasser uf Bützä. Jojo, Fell hemmer doa nid kennt, derfür sini Gerstesuppe uf Gamperney, wo so dick gsi isch, dass der Löffel dri gstande isch.

Wo denn em Tres sin Vater, also üsere Grossvater Florian d’Grossviehzucht altersbedingt ufgi hett, hett er sich Schööf aagschaffet, und nid wenigi. Dr 100%-Job bi der Lippuner Klimatechnik isch em nid gnueg gsi. Jo, en Chrampfi-Cheib halt!

Chauffeur und Hobby-Schofbuur, es bliibt chumm Zyt für anders und dennoch het er sich 1996 mit em Choof vumene Ross en Traum verwürklicht.

O während sinere Pensionszyt isch d’Arbeit an zentraler Stell g’stande. Nochdem er d’Schööf alli verchoft het, sind Arbeite im Wald g’startet.

S’eint oder ander Liida vu dr körperliche Arbeit hett ne zwunge, alles e chli ruhiger a z’guh. Haha, denggschte, Rücksicht uf sich hett er doch öfters vermissa luuh, und so isch er o i siina letschta Johra ständig uf dr Suech noch nere sinnvolla Arbeit gsi.

Sogar no e Wucha vor sim Tod het er d’Gable packt und i dr Hoschtet jos s’Grääs g’worbet.

Nenn mir üs doch gemeinsam Zyt und erinneren üs a di eint oder anderi Episoda vum Tres, üsem Vater. Gern zeigen mir do derzue e paar Fotene, untermoolet mit sim Lieblingslied: «Der letzte Postillion vom St. Gotthard».